نسخه RSS سارال خبر

    سارال خبر: هۆنڕاوه‌یه‌ک له‌ مامۆستا شاهموراد موشتاق ناوبانگ به‌ "شامی‌کرماشانی" به‌ زاراوه‌ی کوردی- خواروو( بن‌زاراوه‌ی که‌لهوڕی،کرماشانی) 

     سارال خبر- این شعر در وبلاگ «هه وه تو» درج گردیده است شعری از استاد "شامی کرماشانی" با لهجه‌ی کوردی جنوب(زیرلهجه‌ی کلهری)

     

    "ڕوون نه‌واتی"   

    مه‌ردم باینه‌ دیار، ئی به‌دبه‌ختییه‌

                     ڕوون خاترجه‌م، وه‌ی شاره‌ نییه‌

    چیم ڕوون بسینم، له‌ یاروو به‌قاڵ

                     ئه‌ڕای ناو هه‌ڵوای، جومعه‌ی ئاخرساڵ

    سڵامی کردم،وه‌ت:ئه‌له‌یک گشت‌که‌س

                     ئه‌و کاسه‌ ئه‌ڕای، چه‌ گرتید وه‌ده‌س؟

    ماس توای؟نه‌یرم،ڕوب توای؟نییه‌

                      شیره‌ دوو جوور هه‌س،سفید و سیه‌ھ

    وه‌تم: مه‌شه‌یی زنده‌ی گیانت بوو

                     به‌قاڵی بایس گشت جنسی داشتوو  

    وه‌تم:ڕوون توام،ڕوون خاترجه‌م

                      ئه‌ر دیری بیه‌پیم، گیان خوه‌ت قه‌سه‌م

    به‌قاڵ گورجه‌و بی، ئه‌وه‌ڵ کاری کرد

                      ده‌س چه‌پ هاورد ده‌س ڕاسم گرت

    ماشه‌ڵڵا وه‌ زوور، مه‌شه‌یی ئه‌لییه‌سکه‌ر

                      وه‌ ئه‌وه‌ڵ ته‌کان، کیشاده‌مه‌ ده‌ر

    وه‌ت:خوه‌م عه‌شایر، چه‌کیده‌ی کوردم

                      ده‌ مه‌ن ڕوون له‌ ماڵ، خاڵووم هاوردم

    دوو ساعه‌ت و نیم، له‌ ڕوون تاریف کرد

                      وه‌ گیان سه‌رکار، مه‌غز له‌ سه‌رم برد

    نه‌ مه‌زه‌ی کردم،نه‌ له‌لی خواردم

                      شه‌ش تمه‌ن و نیم، ئه‌ڕای شماردم

    هه‌رچه‌ند قه‌رز کردویم، وه‌لی وه‌ خوه‌شحاڵ

                      شیره‌ و ئارد و ڕوون، هاوردمه‌ ماڵ

    تا ڕوون ڕشاندم، وه‌ ناو تاوه‌

                      دیم بووگه‌ن ڕوون خه‌یلێ خراوه‌!

    وه‌ گیان سه‌رکار، شووخی ده‌ر ڕه‌فته‌

                      من گه‌مان کردم، بووگه‌ن نه‌فته‌

    زه‌ڕه‌ی له‌ هه‌ڵوا، نیامه‌ بان زوان

                      دڵ و ده‌روونم، وه‌ختوو بایته‌ بان

    تاوه‌ هه‌ڵ گردم، به‌ره‌و ناو هه‌سار

                      گن‌گن له‌ی هه‌ڵوا، دامه‌ قه‌ی دیوار

    هه‌مسایه‌یل وه‌تن:"شامی"شیت بییه‌

                       وه‌تم:نه‌ مه‌ردم یه‌ به‌دبه‌ختییه‌

    پویلم هه‌رامه‌ یه‌ بایس بڕشیت

                        ئه‌ر به‌شی بکه‌م،مردییه‌کان کوشیت

    دامه‌ی قه‌ی دیوار، ماڵه‌یک هاوردم

                         تاقنمای ناوڕاس، به‌ن‌که‌شی کردم

    ئی قاڵه‌ ڕه‌سی، وه‌ گووش ساهیوماڵ

                          هاته‌ ناو هه‌سار، کرده‌ی گرم و قاڵ

    ژن ساهیوماڵ،وه‌ ماڵ هاته‌ ده‌یشت

                          وه‌توو چه‌ پنهان مردگ ئه‌ڕام نه‌یشت

    ئه‌و هه‌ر دوشین دات، من ده‌نگ نه‌کردم

                          ئاخر مه‌جبوور بیم، ناو باوکی بردم

    تا یه‌ی دوشین دام، هه‌م پیاو و هه‌م ژن

                          چو سه‌گ هه‌ڵامات، هاوردن په‌ی من

    پیاو هاته‌ وه‌ر، ژنه‌ که‌فته‌ پشت

                          چنگ نانه‌ حه‌ڵقم، وه‌ زیله‌ وه‌ مشت

    هه‌فت هه‌شت ده‌س خواردم،دوو ده‌س وه‌شانم

                                     بیس کرانشین ڕشیانه‌ بانم

    ناو هه‌سار بییه،‌ مه‌یدان نه‌به‌رد

                            جه‌نگ شرووع کریا، وه‌ ئه‌سڵه‌حه‌ی سه‌رد

    وه‌ ته‌شت ڕه‌خت‌شوور،ئه‌فتاوه‌ و ئاوپاش

                             یه‌کێ ئاته‌ش‌ڕیز،یه‌کێ وه‌ مه‌قاش

    تایفه‌ی ئه‌وان،فامیله‌یل من

                          ئاماده‌ی جه‌نگ بین، هه‌م پیاو و هه‌م ژن

    من دیم کار گه‌نه‌،ناو خودا بردم

                          کراواته‌که‌ی باقرخان گرتم

    هه‌ر وه‌ک کیسه‌که‌ش له‌ ناو حه‌مام

                           دریژی کردم مشتووماڵی دام

    باقر خان له‌ ژیر، بیس نه‌فه‌ر له‌ بان

                           من له‌ ناوڕاس،جوور که‌واو لای نان

    شه‌مه‌ و شه‌کره‌لی،شه‌مسوڵڵا و شیرزا

                            مووسا و مام وه‌لی، مسته‌فا و میرزا

    بچیم وه‌ سه‌ر وه‌خت، ژنه‌یل ده‌لیر

                             ده‌سته‌ی چوو پڵنگ، عده‌ی وینه‌ی شیر

    مه‌رزیه‌ و مه‌هوه‌ش،مه‌هین و مه‌هناز

                             شوهره‌ و شه‌راره‌،شه‌هین و شه‌هناز

    ئامنه‌ و ملووک، ئاسیه‌ و ئه‌قده‌س

                             زوڵف یه‌کتری، پیچانوون وه‌ ده‌س

    تابان وه‌ تاکه‌وش،جیران وه‌ جاڕوو

                             له‌یلا وه‌ له‌قه‌ و گوڵبانوو وه‌ چوو

    مه‌هوه‌ش مه‌دهووش بی،قه‌مه‌رتاج غه‌ش کرد

                             نسره‌ت خوه‌ی هه‌ڵاک، له‌ بان له‌ش کرد

    چه‌ن شیشه‌ی ماتیک، له‌ هنگام جه‌نگ

                             ڕشیاو و شکیا، زه‌مین کرد وه‌ ڕه‌نگ

    یه‌ی کیلوو که‌نیا، زوڵف گیس جووراوجوور

                              هه‌نایی،سفید،سیاه،بازوو بوور

    دوو ساعه‌ت و نیم، جه‌نگ ئدامه‌ داشت

                              سه‌د له‌عنه‌ت وه‌ ڕوون، توخم نزا کاشت

    به‌عده‌ز مه‌رافه‌ و ده‌عوا و گرم و قاڵ

                               سه‌یل جه‌نگ که‌ره‌یل، یه‌ک‌یه‌ک چینه‌ ماڵ

    خوه‌م ته‌نیا مه‌نم، وه‌ دڵه‌ی پڕ ده‌رد

                         گیج و سه‌رگه‌ردان، شه‌رمه‌نده‌ و ڕووزه‌رد

    نه‌ ڕای په‌ستم بی،نه‌ ڕاگه‌ی پیشم

                          نه‌ ڕووی ماڵ خوه‌م، نه‌ قه‌وم و خیشم

    وه‌تم: سوب بچم سمساری بارم

                         هه‌ستیم هه‌ڕاج که‌م بچمه‌ په‌ی کارم

    "شامی" مه‌رافه‌ی ڕوون نه‌واتی

                          هه‌ستیت داده‌ باد خستتیه‌ لاتی!   

            زمسان 1344

    منبع: http://hewetu.blogsky.com/

     

    آيتم جزئيات

    بازدید ها: 791 l تاریخ ارسال پنجشنبه, 28 اسفند 1393 ساعت 23:14 توسط سارال خبر l کد خبری: 4326

    اضافه کردن نظر

    سارال خبر نظراتی را که حاوی توهین یا افترا است، منتشر نمی کند.
    لطفا از نوشتن نظرات خود به صورت حروف لاتین (فینگلیش) خودداری نمایید.


    تبلیغات
    
    

    ســـارال خبـــــر

    آخرین عناوین اخبار دیواندره